Marcus Rashford Oo Daaha Laga Qaaday Inuu Ku Biiriyo Mid Kamid ah Kooxaha Sacuudiga..

Marcus Rashford oo heli kara fursad uu uga tago Man United kadib dalabyo ka yimid kooxaha Sacuudiga.

Marcus Rashford ayaa lagu wadaa inuu ka tago Manchester United mustaqbalka dhow, kaddib markii uu qirtay inuu diyaar u yahay caqabad cusub, iyadoo kooxo ka dhisan Sacuudiga ay muujiyeen xiiso ay u qabaan saxiixiisa.

Kooxo dhowr ah oo ka dhisan horyaalka Sacuudiga ayaa diyaar u ah inay Rashford fursad u siiyaan inuu dib u bilaabo xirfaddiisa kubadda cagta, waxaana ka mid ah Al-Nassr oo uu ka tirsan yahay Cristiano Ronaldo.

Rashford ayaa laga reebay safka Manchester United ciyaartii derby-ga Manchester ee Axaddii, taasoo sii hurisay hadal-heynta ku saabsan mustaqbalkiisa. Xiddiga reer England ayaa markaas kaddib wareysi uu bixiyay bartamaha toddobaadka ku sheegay inuu diyaar u yahay inuu u dhaqaaqo meel cusub.

Sida lagu xusay warbixin uu qoray The Telegraph, afar ka mid ah kooxaha ugu sarreeya Saudi Pro League – Al-Ittihad, Al-Hilal, Al-Nassr, iyo Al-Ahli – ayaa xiiseynaya Rashford. Kooxda dhawaan u soo dallacday horyaalka, Al-Qadsiah, ayaa sidoo kale lagu sheegay inay doonayso adeegiisa.

Inkasta oo aan la hubin haddii Rashford uu dhab ahaantii xiiseyn doono u wareegista Sacuudiga, hadalladiisii hore ee usbuucan waxay muujiyeen ciyaaryahan doonaya caqabad cusub. Si kastaba ha ahaatee, waxaa la filayaa inuu doorbidayo inuu sii joogo Yurub.

Xiisaha Al-Nassr ee Rashford ma ahan wax lala yaabo; kooxda Sacuudiga ah ayaa tan iyo markii ay Cristiano Ronaldo ku soo xerogelisay heshiis waalli ah sanadkii 2022, si joogto ah loola xiriirinayay xiddigaha ugu waaweyn Yurub.

Cristiano Ronaldo, oo Rashford la ciyaaray intii uu ku sugnaa Old Trafford, ayaa lagu soo warramayaa inuu kooxda ku booriyay inay tartan u galaan saxiixyada waaweyn, sida Kevin De Bruyne, markii loo maleynayay inuu ka tagi doono Manchester City xagaagii hore.

Inkasta oo aan cadeyn la hayn in Ronaldo uu taageersan yahay qorshaha lagu heli karo Rashford, wuxuu siin karaa Al-Nassr macluumaad dhameystiran oo ku saabsan xiddigan oo ay ka soo wada ciyaareen Manchester United, haddii ay go’aansadaan inay u dhaqaaqaan saxiixiisa.